സന്ദർശക വിസയിൽ സൗദിയിൽ എത്തിയ രണ്ടു വയസ്സുകാരൻ മരിച്ചു

26

ദമ്മാം: ആറു ദിവസം മുൻപ് സന്ദർശക വിസയിൽ എത്തിയ രണ്ടു വയസ്സുകാരൻ ന്യുമോണിയ ബാധിച്ചു മരിച്ചു. മലപ്പുറം ചോക്കാട്​, കാഞ്ഞിരംപാടം കുത്രാടൻ ഷെമീർ- ജാസ്​മിൻ ദമ്പതികളുടെ  മകൻ അബ്​ദുൽ ഹാദിയാണ്​ മരിച്ചത്​. കഴിഞ്ഞ ഏഴിന് ഉമ്മക്കും സഹോദരനും ഒപ്പം എത്തിയ അബ്​ദുൽ ഹാദിക്ക്​  പനി ബാധിച്ചതിനെ തുടർന്നാണ് അൽ ഖോബാറിലെ സ്വകാര്യ ആശുപത്രിയിലെ ഡോക്​ടറെ സമീപിച്ചത്​. രണ്ട്​ ദിവസം സാദാ ചികിൽസകൾ നൽകി വിട്ടയച്ചുവെങ്കിലും രോഗത്തിന്​ ശമനം കാണാത്തതിനാൽ മൂന്നാം ദിവസം ആശുപത്രിയിൽ പ്ര​േവശിപ്പിച്ചു.
ന്യൂമോണിയ ആണന്ന്​ സ്​ഥിരീകരിച്ചുവെങ്കിലും കൂടുതൽ ചികിത്സ നൽകാനുള്ള സംവിധാനങ്ങൾ തങ്ങൾക്ക്​ ഇല്ലെന്നും മറ്റൊരു ആശുപത്രിയിലേക്ക്​ മാറ്റണമെന്നും ആവശ്യപ്പെടുകയായിരുന്നു എന്ന്​ രക്ഷിതാക്കൾ പറഞ്ഞു. ദമ്മാമിലെ​ മെറ്റേണിറ്റി ആശുപത്രിയെയും സമീപിച്ചുവെങ്കിലും  കിടക്ക ഒഴിവില്ലെന്ന കാരണം പറഞ്ഞ്​ തിരിച്ചയക്കുകയായിരുന്നു. തുടർന്ന്​ മറ്റൊരു സ്വകാര്യ ആശുപത്രിയെ സമീപിച്ചപ്പോൾ വൻതുക ആദ്യം കെട്ടിവെക്കണമെന്ന്​ ആവശ്യപ്പെട്ടുവത്രെ. സ്​പോൺസറുടെ സഹായത്താൽ തുക കണ്ടെത്തി കെട്ടിവെച്ച്​ അവിടേക്ക്​ മാറ്റാൻ ശ്രമിക്കുന്നതിനിടയിലാണ്​ തിങ്കളാഴ്​ച രാത്രി 11 മണിയോടെ കുട്ടി​ മരിച്ചത്​​.
ഖോബാറിലെ പ്രമുഖ ആശുപത്രിയിൽ ന്യുമോണിയ ചികിൽസകൾക്കുള്ള സംവിധാനമില്ലെന്ന വാദം വിശ്വസിക്കാൻ ബന്ധുക്കൾ തയാറായിട്ടില്ല. ഇൻഷുറൻസ്​ പരിരക്ഷ ലഭിക്കാത്തതിനാൽ ചികിൽസകൾ വൈകിപ്പിച്ചതായിരിക്കാം എന്നാണ്​ സംശയം . നാലു വയസ്സുകാരൻ മുഹമ്മദ്​ അലിയാണ്​ സഹോദരൻ . മയ്യത്ത്​ ദമ്മാമിൽ ഖബറടക്കുന്നതിനുള്ള നടപടികൾ പുരോഗമിക്കുകയാണ്​.

സന്ദർശക വിസയിൽ എത്തുന്നവർക്കും ഇൻഷുറൻസ്​ എടുക്കാറുണ്ട്​. കുറഞ്ഞ തുകക്കുള്ള ഇൗ ഇൻഷുറൻസ്​ ഉപയോഗിച്ച്​ അടിയന്തര  ചികിത്സകൾ സാധ്യമാകും. ഗുരുതര രോഗം ബാധിച്ച കുട്ടിയെ ചികിത്സിക്കാൻ ഇൻഷുറൻസ്​ പരിരക്ഷക്ക്​ വേണ്ടി കാത്തുനിൽക്കേണ്ടതില്ല എന്നാണ്​ നിയമം. കുട്ടിയുടെ രക്ഷിതാക്കളും സ്​പോൺസറും അവസാനം വരെ അക്ഷീണ യത്​നം നടത്തിയതിനു ശേഷമാണ്​ മറ്റൊരു സ്വകാര്യ ആശുപത്രിയിൽ പ്രവേശനം ലഭിച്ചത്​. എന്നാൽ അപ്പോഴേക്കും രോഗം കലശലായി കുട്ടി മരണപ്പെടുകയായിരുന്നു. ഇൻഷുറൻസ്​ കമ്പനികൾക്കും, ആശുപത്രിക്കുമെതിരെ നിയമപരമായി പരാതി നൽകു​െമന്ന്​ സ്​പോൺസർ  പറഞ്ഞതായി ബന്ധുക്കൾ അറിയിച്ചു.