ആർബിഐ 2000 രൂപ നോട്ടുകൾ പിൻവലിക്കുമോ??

5

ന്യൂഡൽഹി : റിസർവ് ബാങ്ക് 2,000 രൂപ നോട്ടുകൾ പിൻവലിക്കുന്നു എന്ന പ്രചാരണം സമൂഹ മാധ്യമങ്ങളിൽ ശക്തമാണ്. റിസർവ് ബാങ്ക് പുതിയ 1,000 രൂപ നോട്ടുകൾ പുറത്തിറക്കുന്നതിനാൽ 2,000 രൂപ നോട്ടുകൾ പിൻവലിക്കും, ഒക്ടോബര്‍ 10ന് ശേഷം 2,000 രൂപ നോട്ട് മാറ്റി കിട്ടില്ല തുടങ്ങിയ വാർത്തകളാണ് പ്രചരിക്കുന്നത്. ഇത് ശ്രദ്ധയിൽപ്പെട്ടതോടെ വാർത്ത വ്യാജമാണെന്ന വിശദീകരണവുമായി ആർബിഐ തന്നെ രംഗത്ത് എത്തിയിരുന്നു.

എന്താണ് വിഷയത്തിലെ യാഥാർത്ഥ്യം? പ്രചാരത്തിൽ ഉള്ള 2,000 രൂപ നോട്ടുകൾ കേന്ദ്ര ബാങ്ക് പിൻവലിക്കുന്നു. ഇനി ഇവ മാറ്റി കിട്ടില്ല തുടങ്ങിയ വാർത്തകൾ സമൂഹ മാധ്യമങ്ങളിലൂടെ പ്രചരിക്കാൻ കാര്യമെന്താണ്?

ആർബിഐ പുതിയ 2000 രൂപ നോട്ടുകളുടെ അച്ചടി ഇപ്പോൾ നിർത്തി വെച്ചിരിക്കുകയാണ് എന്നതാണ് സത്യം.നടപ്പു സാമ്പത്തിക വര്‍ഷം ഒരു 2,000 രൂപ നോട്ടു പോലും റിസ‍‍‍ര്‍വ് ബാങ്ക് പുറത്തിറക്കിയിട്ടില്ലെന്ന് അടുത്തിടെ ലഭിച്ച ഒരു വിവരാവകാശ രേഖയിൽ പറയുന്നതായി റിപ്പോർട്ടുകൾ പുറത്ത് വന്നിരിക്കുകയാണ്.

2016-17 സാമ്പത്തിക വര്‍ഷത്തില്‍ ഏകദേശം 3,542.991 മില്ല്യണ്‍ 2,000 രൂപ നോട്ടുകളാണ് ആര്‍ബിഐ അച്ചടിച്ചത്. 2017-18 ല്‍ ഇത് 111.507 മില്ല്യണും 2018-19ല്‍ ഇത് 46.690 മില്ല്യണും മാത്രമാണ്. സാവധാനം നോട്ടുകൾ അച്ചടിക്കുന്നത് പൂ‍ര്‍ണമായി നിര്‍ത്തിയേക്കാം എന്ന് ധനകാര്യ വിദഗ്ധര്‍ തന്നെ ചൂണ്ടിക്കാട്ടുന്നുണ്ട്.

കള്ളപ്പണം വെളുപ്പിക്കാന്‍ എന്ന ലക്ഷ്യത്തോടെ പുറത്തിറക്കിയ നോട്ടുകള്‍ ലക്ഷ്യം കാണുന്നതില്‍ പരാജയപ്പെട്ടതിനാല്‍ കൂടുതൽ 1,000 രൂപ നോട്ടുകള്‍ പ്രചാരത്തില്‍ എത്തിയേക്കും എന്നും ഊഹാപോഹങ്ങള്‍ ഉണ്ട്. 2016 നവംബറിലാണ് നോട്ടു നിരോധനത്തിന്‍റെ ഭാഗമായി സര്‍ക്കാര്‍ പ്രചാരത്തില്‍ ഇരുന്ന 500,1000 രൂപ നോട്ടുകള്‍ പിന്‍വലിച്ച് പുതിയ 500 രൂപ,2,000 രൂപ നോട്ടുകള്‍ പുറത്തിറക്കിയത്.