ദുബൈ: യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് അല്‍ മക്തൂമിന്റെ നിര്‍ദേശപ്രകാരം ശൈഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം 1.5 ബില്യണ്‍ ദിര്‍ഹത്തിന്റെ സാമ്പത്തിക പാക്കേജ് പ്രഖ്യാപിച്ചു. ദുബൈയിലെ കമ്പനികളെയും ബിസിനസ്സ് മേഖലയെയും പിന്തുണയ്ക്കുന്നതിനായി അടുത്ത മൂന്ന് മാസത്തേക്കാണ്് ഉത്തേജക പാക്കേജ്. ദ്രവ്യത വര്‍ദ്ധിപ്പിക്കാനും നിലവിലെ ആഗോള സാമ്പത്തിക സാഹചര്യത്തിന്റെ ആഘാതം കുറയ്ക്കാനുമാണ്് പാക്കേജ്. ലോകമെമ്പാടും കൊറോണ വൈറസ് പൊട്ടിപ്പുറപ്പെട്ടതോടെ ആഗോള സമ്പദ്വ്യവസ്ഥ ഇപ്പോള്‍ നേരിടുന്ന വെല്ലുവിളികള്‍ രൂക്ഷമായതായി ശൈഖ് ഹംദാന്‍ പറഞ്ഞു. അസാധാരണമായ ഈ സാഹചര്യങ്ങളില്‍ പൗരന്മാര്‍ക്കും താമസക്കാര്‍ക്കും നിക്ഷേപകര്‍ക്കും ഏറ്റവും ഉയര്‍ന്ന പിന്തുണ നല്‍കുന്നതിനായി ഈ ഉത്തേജക പാക്കേജ് ആരംഭിക്കാന്‍ ശൈഖ് മുഹമ്മദ് ബിന്‍ റാഷിദ് നിര്‍ദ്ദേശം നല്‍കിയിരുന്നു. ലോകം ദുഷ്‌കരമായ സമയങ്ങളിലൂടെ കടന്നുപോകുന്നുണ്ടെങ്കിലും വെല്ലുവിളികള്‍ വിജയകരമായി മറികടക്കാനുള്ള കഴിവ് ഞങ്ങള്‍ക്ക് ഉണ്ട്. എശൈഖ് മുഹമ്മദില്‍ നിന്ന് പഠിച്ചതുപോലെ, വെല്ലുവിളികള്‍ നൂതനവും ക്രിയാത്മകവുമായ പരിഹാരങ്ങള്‍ സൃഷ്ടിക്കുന്നതിലൂടെ വികസിപ്പിക്കാനും മുന്നേറാനുമുള്ള ഒരു സമൂഹത്തിന്റെ കഴിവ് വര്‍ദ്ധിപ്പിക്കുന്നു. ഞങ്ങളുടെ പുരോഗതിയെ തടസ്സപ്പെടുത്തുന്ന ഏതെങ്കിലും തടസ്സങ്ങള്‍ പരിഹരിക്കുന്നതിലൂടെ ഞങ്ങളുടെ അഭിലാഷ വികസന ലക്ഷ്യങ്ങള്‍ ഉറപ്പാക്കാനാണ് ഈ ഉത്തേജക പാക്കേജ് വിപുലീകരിക്കുന്നത്. ഇത്തരം സംരംഭങ്ങളിലൂടെ താമസിക്കുന്നതിനും ജോലി ചെയ്യുന്നതിനുമുള്ള ലോകത്തിലെ ഏറ്റവും മികച്ച നഗരമെന്ന നിലയില്‍ ദുബൈ അതിന്റെ നേതൃത്വവും പ്രൊഫൈലും നിലനിര്‍ത്തുന്നുവെന്ന് ഉറപ്പാക്കാന്‍ ഞങ്ങള്‍ ആഗ്രഹിക്കുന്നു-ശൈഖ് ഹംദാന്‍ പറഞ്ഞു. ലോകത്തിന്റെ ഭാവി രൂപപ്പെടുത്തുന്നതില്‍ ഒരു പ്രധാന ഘടകമാകാനുള്ള ശ്രമങ്ങള്‍ ഞങ്ങള്‍ തുടരുകയാണ്. സമൂഹത്തിന്റെ ക്ഷേമവും സന്തോഷവും ഉറപ്പുവരുത്തുന്നതിനും അവരുടെ സ്വപ്‌നങ്ങള്‍ സാക്ഷാത്കരിക്കുന്നതിന് അവരെ പ്രാപ്തരാക്കുന്നതിനും ഞങ്ങള്‍ ഏറ്റവും ഉയര്‍ന്ന മുന്‍ഗണന നല്‍കുന്നു. ഉയര്‍ന്ന നിലവാരവും വിജയവും നേടാന്‍ ആളുകളെ പ്രാപ്തരാക്കുന്നതില്‍ ദുബൈ ഒരു മാതൃകയായി തുടരുന്നുവെന്ന് ഉറപ്പാക്കാനുള്ള എല്ലാ ശ്രമങ്ങളും ഉപയോഗപ്പെടുത്തും. ഉത്തേജക പാക്കേജ് ബിസിനസ്സ് ചെയ്യുന്നതിനുള്ള ചെലവ് കുറയ്ക്കുന്നതിനും ബിസിനസ് നടപടിക്രമങ്ങള്‍ ലളിതമാക്കുന്നതിനും സഹായകമാകും. പ്രത്യേകിച്ചും ടൂറിസം, റീട്ടെയില്‍, വ്യാപാരം, ലോജിസ്റ്റിക് സേവനങ്ങള്‍ എന്നിവക്ക്. ഉടനടി പ്രാബല്യത്തില്‍ വരുത്തുന്ന ഉത്തേജക നടപടികള്‍ അടുത്ത മൂന്ന് മാസത്തേക്ക് സാധുവായിരിക്കും. ഈ കാലയളവില്‍ സാമ്പത്തിക സ്ഥിതിയിലെ നടപടികളുടെ ആഘാതം അവലോകനം ചെയ്യും. വാണിജ്യ മേഖല, റീട്ടെയില്‍, ബാഹ്യ വ്യാപാരം, ടൂറിസം, ഊര്‍ജ്ജ മേഖല എന്നിവ കേന്ദ്രീകരിച്ചുള്ള 15 സംരംഭങ്ങള്‍ ദുബൈ സര്‍ക്കാര്‍ വികസിപ്പിച്ചെടുത്ത ഉത്തേജക പാക്കേജില്‍ ഉള്‍പ്പെടുന്നു. അടുത്ത മൂന്ന് മാസത്തിനുള്ളില്‍ പാക്കേജ് മറ്റ് എല്ലാ മേഖലകളിലും പ്രത്യക്ഷവും പരോക്ഷവുമായ സ്വാധീനം ചെലുത്തുമെന്ന് പ്രതീക്ഷിക്കുന്നു.
