ഒരു മാസം പ്രായമായ കൈക്കുഞ്ഞുമായി ഓഫീസില്‍; കോവിഡ് പോരാട്ടത്തില്‍ താരമായി വനിതാ ഐ.എ.എസ് ഓഫീസര്‍

11
ശ്രിജന ഗുമ്മല്ല കുഞ്ഞുമായി ഡ്യൂട്ടിയില്‍

വിശാഖപട്ടണം: ആറുമാസത്തെ പ്രസവാവധി ഉപേക്ഷിച്ച് കൈക്കുഞ്ഞുമായി ജോലിയില്‍ പ്രവേശിച്ചിരിക്കുകയാണ് ആന്ധ്രയില്‍ ഒരു ഐ.എ.എസ് ഓഫീസര്‍.
ഗ്രേറ്റര്‍ വിശാഖപട്ടണം മുനിസിപ്പല്‍ കോര്‍പ്പറേഷന്റെ (ജിവിഎംസി) കമ്മിഷണറായി സേവനമനുഷ്ഠിക്കുന്ന ശ്രിജന ഗുമ്മല്ലയാണ് അവധി ഉപേക്ഷിച്ച് തിരികെ ജോലിയില്‍ പ്രവേശിച്ചിരിക്കുന്നത്. 2013 ബാച്ചുകാരിയാണ് ശ്രിജന കുഞ്ഞിനെയുമെടുത്ത് ഓഫീസില്‍ ജോലിയില്‍ മുഴുകിയിരിക്കുന്നത്. ശ്രിജനയുടെ ചിത്രം ഇതിനകം സോഷ്യല്‍ മീഡിയയില്‍ വൈറലായിക്കഴിഞ്ഞു. ‘ഐഎഎസ് അസോസിയേഷനിലെ അസാധാരണമായ ഒരു തൂവല്‍’ എന്ന വിശേഷണത്തോടെ ചിഗുരു പ്രശാന്ത് കുമാര്‍ എന്നയാളാണ് ശ്രിജനയുടെ ചിത്രം ആദ്യം പങ്കുവെച്ചത്. കമ്മിഷണര്‍ പ്രസവാവധി നിരസിച്ച് ഒരുമാസം പ്രായമായ കുഞ്ഞിനെയും കൊണ്ട് ജോലിയില്‍ വീണ്ടും പ്രവേശിച്ചിരിക്കുന്നു, എല്ലാ കോവിഡ് പോരാളികള്‍ക്കെല്ലാം തീര്‍ച്ചയായും ഇത് പ്രചോദനം നല്‍കുന്നു. പ്രശാന്ത് തന്റെ ട്വീറ്റില്‍ പറയുന്നു. കുഞ്ഞിന്റെ സുരക്ഷിതത്വം ഉറപ്പാക്കിയുണ്ടെന്നും എല്ലാ മുന്‍കരുതലുകളുമായാണ് താന്‍ ജോലിയില്‍ പ്രവേശിച്ചിരിക്കുന്നതെന്നും ശ്രിജന വ്യക്തമാക്കി.
ഒരു മാസം പ്രായമായ കുഞ്ഞിനെ പാലൂട്ടന്നതിനും അമ്മയുടെ സാമീപ്യം ഉറപ്പുവരുത്തന്നതിനുമാണ് ശ്രിജന കുഞ്ഞിനെയും ഒപ്പം കൂട്ടിയത്. വളരെ സുരക്ഷിതമായ അന്തരീക്ഷത്തിലാണ് കുഞ്ഞ് തനിക്കൊപ്പമുള്ളതെന്നും ശ്രിജന പറയുന്നു. ശ്രിജനയെ അഭിനന്ദിച്ച് നിരവധി പേരാണ് സോഷ്യല്‍മീഡിയയില്‍ അടക്കം രംഗത്തെത്തിയിരിക്കുന്നത്. രാജ്യം കോവിഡിനെതിരെ പോരാടുമ്പോള്‍ ശ്രീജനയെപ്പോലുള്ളവര്‍ നല്‍കുന്ന ഊര്‍ജ്ജം ചെറുതല്ലെന്ന് പലരും ചൂണ്ടിക്കാട്ടുന്നു.