ഒരു ലക്ഷം കുടുംബങ്ങള്‍ക്ക് സഹായമെത്തിക്കാന്‍ അമിതാഭ് ബച്ചന് പിന്തുണയുമായി കല്യാണ്‍ ജൂവലേഴ്‌സ്

13

ദുബൈ: ഒരു ലക്ഷം കുടുംബങ്ങള്‍ക്ക് സഹായമെത്തിക്കാനുള്ള അമിതാഭ് ബച്ചന്റെ ‘വി ആര്‍ വണ്‍’ പദ്ധതിക്ക് കല്യാണ്‍ ജൂവലേഴ്‌സ് പിന്തുണ പ്രഖ്യാപിച്ചു. ഒരു ലക്ഷം ദിവസ വേതന തൊഴിലാളികള്‍ക്കാണ് അമിതാഭ് ബച്ചന്റെ നേതൃത്വത്തില്‍ സഹായമെത്തിക്കുന്നത്. ഇതില്‍ 50,000 പേരുടെ കുടുംബങ്ങള്‍ക്കുള്ള സഹായമാണ് കല്യാണ്‍ ജൂവലേഴ്‌സ് നല്‍കുന്നത്. സ്വര്‍ണാഭരണ നിര്‍മാണ മേഖലയിലും സിനിമാ മേഖലയിലും പണിയെടുക്കുന്ന ദിവസ വേതനക്കാരുടെ കുടുംബങ്ങള്‍ക്കാണ് കല്യാണ്‍ ജൂവലേഴ്‌സ് സഹായമെത്തിക്കുന്നത്. കേരളത്തിലെ ജൂവലറി മാനുഫാക്‌ചേഴ്‌സ് അസോസിയേഷന്‍, കോയമ്പത്തൂര്‍ ജൂവല്ലേഴ്‌സ് അസോസിയേഷന്‍, മുംബൈയിലെ ജെംസ് ആന്റ് ജൂവലറി എക്‌സ്‌പോര്‍ട്ട് പ്രമോഷന്‍ കൗണ്‍സില്‍ എന്നീ സംഘടനകള്‍ നിര്‍ദേശിക്കുന്ന സ്വര്‍ണാഭരണ നിര്‍മാണ മേഖലയിലെ ദിവസ വേതനക്കാര്‍ക്കാണ് ‘ഗോള്‍ഡ് സ്മിത് റിലീഫ് ഫണ്ട്’ വഴി സഹായമെത്തിക്കുക. സിനിമാ മേഖലയിലെ ഗുണഭോക്താക്കളെ ഫെഫ്ക കണ്ടെത്തി നിര്‍ദേശിക്കും. കൂടാതെ, കോവിഡ് പ്രതിരോധത്തെ കുറിച്ച് അവബോധം സൃഷ്ടിക്കാന്‍ നിര്‍മിക്കുന്ന പരസ്യ ചിത്രത്തിനും കല്യാണ്‍ പിന്തുണ പ്രഖ്യാപിച്ചു. അമിതാഭ് ബച്ചന് പുറമെ രജനികാന്ത്, മമ്മൂട്ടി, മോഹന്‍ ലാല്‍, രണ്‍ബീര്‍ കപൂര്‍, ചിരഞ്ജീവി, ശിവ് രാജ്കുമാര്‍, പ്രിയങ്ക ചോപ്ര, ആലിയ ഭട്ട് തുടങ്ങിയവര്‍ ഈ പരസ്യ ചിത്രത്തില്‍ വേഷമിടും. മുമ്പുണ്ടായിട്ടില്ലാത്ത വിധം ആഗോള തലത്തിലുള്ള മഹാമാരിയിലൂടെയാണ് മനുഷ്യരാശി കടന്നു പോകുന്നതെന്ന് കല്യാണ്‍ ജൂവലേഴ്‌സ് ചെയര്‍മാനും എംഡിയുമായ ടി.എസ് കല്യാണരാമന്‍ പറഞ്ഞു. വലിയ വെല്ലുവിളിയുടെ ഈ സമയത്ത് അമിതാഭ് ബച്ചനൊപ്പം ചേര്‍ന്ന് ദിവസ വേതനക്കാരായ തൊഴിലാളി കുടുംബങ്ങള്‍ക്ക് ആശ്വാസമേകാനാണ് ഈ സഹായം നല്‍കുന്നതെന്നും അദ്ദേഹം പറഞ്ഞു.