മലയാളികള്‍ മരിച്ചുവീഴുമ്പോള്‍ കേരളം സുരക്ഷിതമെന്ന് മേനിപറയുന്ന സര്‍ക്കാര്‍ അപമാനം: കുഞ്ഞാലിക്കുട്ടി

38

മലപ്പുറം: ലോകത്ത് വിവിധയിടങ്ങളില്‍ കേരളീയര്‍ മരിച്ചുവീഴുമ്പോള്‍ കേരളം സുരക്ഷിതമെന്ന് മേനിപറയുന്ന സര്‍ക്കാര്‍ അപമാനമാണെന്ന് പി.കെ കുഞ്ഞാലിക്കുട്ടി എം.പി പ്രവാസികളെയും ഇതര സംസ്ഥാനങ്ങളില്‍ കുടുങ്ങിയവരെയും നാട്ടിലെത്തിച്ച് അവരുടെ ജീവന്‍ സുരക്ഷിതമാക്കുന്നതിന് പകരം അവര്‍ക്ക് വരാനുള്ള വഴികളെല്ലാം കൊട്ടിയടച്ച് കേരളം നമ്പര്‍ വണ്‍ ആണെന്ന് പറയുന്ന സര്‍ക്കാര്‍ എന്തൊരു ക്രൂരതയാണ് കാണിക്കുന്നതെന്നും അദ്ദേഹം പറഞ്ഞു. കേന്ദ്ര സംസ്ഥാന സര്‍ക്കാറുകള്‍ കോവിഡ് കാലത്ത് പ്രവാസികളോട് ചെയ്യുന്ന മനുഷ്യ രഹിത നിലപാടുകള്‍ക്കെതിരെ യു.ഡി.എഫ് ജില്ലാ കമ്മിറ്റി മലപ്പുറത്ത് സംഘടിപ്പിച്ച സമരം ഉദ്ഘാടനം ചെയ്യുകയായിരുന്നു അദ്ദേഹം. വിദേശത്തും ഇതരസംസ്ഥാനങ്ങളിലും കാര്യങ്ങള്‍ കൈവിട്ടുപോകുന്ന അവസ്ഥയിലാണ്. അവിടങ്ങളില്‍ കുടുങ്ങിയവരെ നാട്ടിലെത്തിക്കാന്‍ അടിയന്തര ഇടപെടലുകള്‍ വേണം. ഗള്‍ഫില്‍ നിന്ന് നാട്ടിലേക്ക് വരാന്‍ അപേക്ഷ നല്‍കിയവരില്‍ എത്ര പേര്‍ക്കാണ് നാട്ടിലെത്താന്‍ കഴിഞ്ഞത്. എല്ലാവര്‍ക്കും സ്വാഗതം എന്ന് പറഞ്ഞ സര്‍ക്കാര്‍ എന്ത് സൗകര്യമാണ് ഇവിടെ ഒരുക്കിയത്. നാട്ടിലെത്തിയ പ്രവാസികളടക്കമുള്ളവര്‍ക്ക് മതിയായ ക്വാറന്റൈന്‍ സൗകര്യം ഒരുക്കാതെ സര്‍ക്കാര്‍ വാര്‍ത്താ സമ്മേളനത്തില്‍ മാത്രമാണ് ശ്രദ്ധപതിപ്പിക്കുന്നത്. സ്വന്തം പൈസയെടുത്ത് വിമാനം കയറി നാട്ടിലെത്തുന്ന പ്രവസികള്‍ ക്വാറന്റൈന്‍ ചെലവുകള്‍ സ്വയം വഹിക്കണമെന്ന് പറയുന്നത് അംഗീകരിക്കാനാവില്ല. ധൂര്‍ത്തില്‍ ഒരു കുറവും വരുത്താത്ത ഇടത് സര്‍ക്കാര്‍ കോവിഡിന്റെ പേരിലടക്കം ഫണ്ട് പിരിച്ചിട്ടുണ്ട്. കേന്ദ്ര, സംസ്ഥാന പാക്കേജുകളിലൂടെയും പണം കണ്ടെത്താം എന്നിരിക്കെ പ്രവാസികളുടെ കൈയില്‍ നിന്ന് കുത്തിപിടിച്ച് വാങ്ങുന്നത് ശരിയായ രീതിയല്ല. എല്ലാം ഒറ്റക്ക് ചെയ്യാം എന്ന ധാര്‍ഷ്ട്യമാണ് സര്‍ക്കാറിന്. വിമര്‍ശനങ്ങള്‍പോലും ഉള്‍കൊള്ളാന്‍ മുഖ്യമന്ത്രിക്കും സര്‍ക്കാറിനും ആവുന്നില്ല. ലോക്ക്ഡൗണ്‍ തൊട്ട് കേന്ദ്ര സര്‍ക്കാറിനും പിഴച്ചിരിക്കുകയാണ്. ഒരു ആസൂത്രണവുമില്ലാതെയാണ് കേന്ദ്രം കോവിഡിനെ സമീപിക്കുന്നത്. ഇതുകാരണം ലോകത്ത് തന്നെ കോവിഡ് കേസുകളുടെ എണ്ണത്തില്‍ രാജ്യം മുന്നിലേക്ക് കുതിക്കുകയാണെന്നും സര്‍ക്കാറിന്റെ പരാജയമാണിതെന്നും അദ്ദേഹം പറഞ്ഞു. പ്രവാസികളോട് ഇത്രയും ക്രൂരത കാട്ടുന്ന വേറൊരു രാജ്യവുമില്ലെന്നും പ്രവാസികളുടെ കാര്യത്തില്‍ ഉത്തരവാദിത്തമില്ലാത്തതുപോലെയാണ് കേന്ദ്ര സംസ്ഥാന സര്‍ക്കാറുകള്‍ പെരുമാറുന്നതെന്നും മുസ്്‌ലിംലീഗ് ദേശീയ ഓര്‍ഗനൈസിങ് സെക്രട്ടറി ഇ.ടി മുഹമ്മദ് ബഷീര്‍ എം.പി പറഞ്ഞു. നാട്ടിലെത്തുന്ന പ്രവാസികള്‍ക്ക് എല്ലാ സൗകര്യവും ചെയ്യുമെന്ന കോടതിയില്‍ പറഞ്ഞ സര്‍ക്കാര്‍ എന്താണ് അവര്‍ക്കായി ചെയ്തതെന്ന് കാണിച്ച് തരണം. വിമാനത്താവളത്തില്‍ നിന്നുള്ള യാത്ര തൊട്ട് ഭക്ഷണവും ക്വാറന്റൈന്‍ സൗകര്യങ്ങളുമെല്ലാം അപര്യാപ്തമാണ്. അവരും ഇവിടത്തെ പൗരന്മാരാണെന്ന് സര്‍ക്കാറുകള്‍ മനസ്സിലാക്കണം. പ്രവാസികളില്‍ നാട്ടിലെത്താന്‍ അപേക്ഷ കൊടുത്തവരില്‍ അഞ്ചുശതമാനം പോലും ഇവിടെ എത്തിയിട്ടില്ല. എല്ലാവരേയും നാട്ടിലെത്തിക്കാന്‍ അടിയന്തര ഇടപെടല്‍ വേണമെന്നും അതിന് മുന്നോടിയായി അവര്‍ക്ക് വേണ്ട സൗകര്യങ്ങള്‍ ഒരുക്കാന്‍ സര്‍ക്കാര്‍ ശ്രദ്ധിക്കണമന്നും ഇ.ടി ആവശ്യപ്പെട്ടു. യു.ഡി.എഫ് ജില്ലാ ചെയര്‍മാന്‍ പി.ടി അജയമോഹന്‍ അധ്യക്ഷത വഹിച്ചു. യു.ഡി.എഫ് കണ്‍വീനര്‍ അഡ്വ യു.എ ലത്തീഫ് സ്വാഗതം പറഞ്ഞു. ഡിസിസി പ്രസിഡന്റ് വിവി പ്രകാശ്, വിഎ കരീം, ഇസ്്മായില്‍ മൂത്തേടം, എംഎല്‍എമാരായ എ.പി അനില്‍കുമാര്‍, പി ഉബൈദുല്ല, എം ഉമ്മര്‍, പി അബ്ദുല്‍ഹമീദ്, കെ.കെ ആബിദ് ഹുസൈന്‍ തങ്ങള്‍, ടി.വി ഇബ്രാഹീം പങ്കെടുത്തു. പ്രവാസികളോടുള്ള കേന്ദ്ര സംസ്ഥാന സര്‍ക്കാറുകളുടെ കോവിഡ് കാലത്തെ സമീപനങ്ങളില്‍ പ്രതിഷേധിച്ച് സെക്രട്ടറിയേറ്റിലും സംസ്ഥാന വ്യപകമായി ജില്ലാ ആസ്ഥാനങ്ങളിലുമാണ് യു.ഡി.എഫ് സമരം സംഘടിപ്പിച്ചത്.