ലോക്ക് ഡൗണില്‍ കാഠ്മണ്ഡുവിന് കിട്ടിയത് അപൂര്‍വകാഴ്ച; പതിറ്റാണ്ടുകള്‍ക്ക് ശേഷം എവറസ്റ്റ് കണ്ടു

64
എവറസ്റ്റ് കൊടുമുടി

കാഠ്മണ്ഡു: നേപ്പാള്‍ തലസ്ഥാനമായ കാഠ്മണ്ഡുവിലെ ജനങ്ങള്‍ കഴിഞ്ഞ ദിവസം ഉറക്കമുണര്‍ന്ന മാസ്മരികമായ ഒരു കാഴ്ചയിലേക്കായിരുന്നു. ലോകത്തിലെ ഏറ്റവും വലിയ കൊടുമുടിയായ എവറസ്റ്റിന്റെ മഞ്ഞുപുതച്ച ഔന്നത്യമായിരുന്നു അവരുടെ കണ്ണിനെ കുളിരണിയിച്ചത്. പതിറ്റാണ്ടുകള്‍ക്ക് ശേഷമാണ് ഇങ്ങനെയൊരു അപൂര്‍വ കാഴ്ച. ഇത് സാധ്യമാക്കിയതോ കോവിഡിനെ പ്രതിരോധിക്കാനുള്ള ലോക്ക്ഡൗണും.
രണ്ട് മാസം മുമ്പുവരെ പോലും കാഠ്മണ്ഡുവില്‍ നിന്ന് എവറസ്റ്റ് കാണുന്നതിനെക്കുറിച്ച് ആലോചിക്കാന്‍ പോലുമാകില്ലായിരുന്നു. കോവിഡ് വ്യാപനത്തെ തുടര്‍ന്ന് ലോക്ക് ഡൗണ്‍ പ്രഖ്യാപിച്ചതോടെ വാഹനങ്ങളും ഫാക്ടറികളുമെല്ലാം ഇല്ലാതായി. ഇതോടെ വായുമലിനീകരണം കുറയുകയും അന്തരീക്ഷം തെളിയുകയും ചെയ്തു.
വായുമലിനീകരണം കുറഞ്ഞതോടെ 29029 അടി ഉയരമുള്ള എവറസ്റ്റ് കൊടുമുടി കാഠ്മണ്ഡുവില്‍ നിന്ന് കാണാനായി. ഇപ്പോള്‍ കാഠ്മണ്ഡുവിലുള്ള ആരും തന്നെ ഇതിനുമുമ്പ് എവറസ്റ്റ് ഇങ്ങനെ കണ്ടിട്ടുണ്ടാകില്ല.
ഫോട്ടോഗ്രാഫറായ അഭുഷ്മാന്‍ ഗൗതം ആണ് കാഠ്മണ്ഡുവില്‍ നിന്നുള്ള എവറസ്റ്റിന്റെ കാഴ്ച ക്യാമറയില്‍ പകര്‍ത്തിയത്. നേപ്പാള്‍ ടൈംസാണ് ഈ ചിത്രങ്ങള്‍ ട്വിറ്ററില്‍ പങ്കുവെച്ചത്. എവറസ്റ്റില്‍ നിന്ന് 200 കിലോമീറ്റര്‍ അകലെയുള്ള ചോബാറില്‍ നിന്നാണ് ഗൗതം ചിത്രങ്ങളെടുത്തത്. എവറസ്റ്റ് കാണാനായി എന്നത് മാത്രമല്ല ലോക്ക് ഡൗണ്‍ കൊണ്ടുണ്ടായ നേട്ടം. വായു ഗുണനിലവാരം ഉയര്‍ന്നതോടെ ആളുകള്‍ക്ക് ശ്വാസകോശ സംബന്ധമായ രോഗങ്ങള്‍ കുറഞ്ഞു. ആസ്ത്മ ഉള്‍പ്പെടെയുള്ള ശ്വസന സംബന്ധമായ രോഗങ്ങളുമായി ആശുപത്രികളിലെത്തുന്നവരുടെ എണ്ണം കുറഞ്ഞതായാണ് റിപ്പോര്‍ട്ട്. ലോക്ക് ഡൗണിലായതിന് ശേഷം എവറസ്റ്റ് മാത്രമല്ല, മറ്റ് പര്‍വതങ്ങളും കാണാനായിട്ടുണ്ട്. ഏപ്രിലില്‍ ഹിമാചല്‍പ്രദേശിലെ ധൗലാധര്‍ പര്‍വതനിരകള്‍ ജനന്ധറില്‍ നിന്ന് കാണാന്‍ സാധിച്ചിരുന്നു. നേപ്പാളിലെ ലാങ്താങ് പര്‍വതം ഇന്ത്യന്‍ അതിര്‍ത്തിയിലെ സര്‍ലാഹിയില്‍ നിന്ന് മെയ് ആദ്യം കാണാനായിരുന്നു.