ദീര്‍ഘദൂര ട്രെയിനുകള്‍ ഇന്ന് മുതല്‍ തിരൂര്‍ റെയില്‍വേ സ്റ്റേഷനില്‍ ക്രമീകരണങ്ങളായി

9

മലപ്പുറം: ലോക്ക് ഡൗണിന്റെ പശ്ചാത്തലത്തില്‍ നിര്‍ത്തിവെച്ച ദീര്‍ഘദൂര ട്രെയിന്‍ സര്‍വീസുകള്‍ ഇന്ന് മുതല്‍ പുനരാരംഭിക്കുന്ന സാഹചര്യത്തില്‍ തിരൂര്‍ റെയില്‍വേ സ്റ്റേഷനില്‍ ആവശ്യമായ ക്രമീകരണങ്ങള്‍ ഏര്‍പ്പെടുത്തിയതായി ജില്ലാ കലക്ടറുടെ ചുമതലയുള്ള എ.ഡി.എം എന്‍.എം മെഹറലി അറിയിച്ചു. ഇന്ന് പുലര്‍ച്ചെയോട് കൂടി ട്രെയിനുകള്‍ എത്തിച്ചേരുമെന്നാണ് വിവരം. ഇതര സംസ്ഥാനങ്ങളില്‍ നിന്നും ട്രെയിന്‍ മാര്‍ഗം എത്തിച്ചേരുന്നവരെ കോവിഡ് പരിശോധനക്ക് വിധേയമാക്കുന്നതിനും ക്വാറന്റൈന്‍, വാഹന ഗതാഗതം തുടങ്ങിയ കാര്യങ്ങള്‍ ഏകോകിപ്പിക്കുന്നതിനും ജില്ലാ തലത്തില്‍ വിവിധ വകുപ്പുകളെ ചുമതലപ്പെടുത്തിയിട്ടുണ്ട്.
സ്റ്റേഷനില്‍ എത്തുന്ന യാത്രക്കാരുടെ വിവരങ്ങള്‍ ജില്ലാതല കണ്‍ട്രോള്‍ റൂമിലും കോവിഡ് 19 ജാഗ്രത പോര്‍ട്ടലിലും യഥാസമയം അപ്‌ലോഡ് ചെയ്യും. ഇതിനായി മൂന്ന് പേരടങ്ങുന്ന മൂന്ന് ടീമുകളെ നിയമിച്ചിട്ടുണ്ട്. സ്റ്റേഷനില്‍ പരിശോധനക്ക് ആവശ്യമായ ആരോഗ്യപ്രവര്‍ത്തകരെ നിയോഗിക്കുകയും തെര്‍മല്‍ സ്‌കാനറും മറ്റ് ഉപകരണങ്ങളും സജ്ജീകരിച്ചിട്ടുണ്ട്. പരിശോധനയില്‍ രോഗലക്ഷണങ്ങളുള്ളവരെ കണ്ടെത്തിയാല്‍ അവരെ ആസ്പത്രികളിലെത്തിക്കാന്‍ ആംബുലന്‍സ് സര്‍വീസും ഒരുക്കിയിട്ടുണ്ട്.
റെയില്‍വേ പ്ലാറ്റ്‌ഫോമിനകത്ത് ആവശ്യമായ സുരക്ഷാക്രമീകരണങ്ങള്‍ സംസ്ഥാന പൊലീസ് റെയില്‍വേ പൊലീസുമയി ചേര്‍ന്ന് നിര്‍വഹിക്കും. യാത്രക്കാര്‍ കൃത്യമായ സാമൂഹിക അകലം പാലിക്കുന്നുണ്ടെന്ന് പൊലീസ് ഉറപ്പുവരുത്തും. റെയില്‍വേ സ്റ്റേഷനിലെ ഉച്ചഭാഷിണിയിലൂടെ യാത്രക്കാര്‍ക്ക് കൃത്യമായ വിവരങ്ങള്‍ കൈമാറും. കോവിഡ് 19നുമായി ബന്ധപ്പെട്ട് പാലിക്കേണ്ട സുരക്ഷാ മുന്‍കരുതലുകളും നിര്‍ദേശങ്ങളും യാത്രകാര്‍ക്ക് ഇടവിട്ട് ഉച്ചഭാഷിണിയിലൂടെ നല്‍കും. സ്റ്റേഷനില്‍ ആവശ്യമായ വീല്‍ച്ചെയറുകളും ഉറപ്പ് വരുത്തും. ട്രെയിന്‍ യാത്രകാര്‍ക്കായി കെ.എസ്.ആര്‍.ടി.സി പ്രത്യേക സര്‍വീസ് നടത്തും. അതിനായി മോട്ടോര്‍ വാഹനവകുപ്പിനെ ചുമതലപ്പെടുത്തിയിട്ടുണ്ട്. സ്റ്റേഷനല്‍ പ്രീപെയ്ഡ് ടാക്‌സി സൗകര്യവും ഏര്‍പ്പെടുത്തും. തിരൂര്‍ റെയില്‍വേ സ്റ്റേഷനില്‍ ഒരുക്കിയിട്ടുള്ള മുഴുവന്‍ ക്രമീകരണങ്ങളുടെയും ഏകോപന ചുമതലകള്‍ നിര്‍വഹിക്കുന്നതിനായി തിരൂര്‍ ലാന്‍ഡ് ട്രൈബ്യൂണല്‍ സ്‌പെഷല്‍ തഹസില്‍ദാര്‍ എം.എസ് സുരേഷ്‌കുമാറിനെ സ്റ്റേഷന്‍ തല നോഡല്‍ ഓഫീസറായും ലാന്റ് അക്വസിഷന്‍(ജനറല്‍) സ്‌പെഷല്‍ തഹസില്‍ദാര്‍ കെ.കെ ബിനിയെ സ്റ്റേഷന്‍ തല അസിസ്റ്റന്റ് നോഡല്‍ ഓഫീസറായും നിയമിച്ചിട്ടുണ്ട്.