മുതലമടയില്‍ പൊള്ളാച്ചിസ്വദേശി ചികിത്സതേടിയ മുതലമട പ്രാഥമികാരോഗ്യകേന്ദ്രം അടച്ചു

7

ഡോക്ടറും ആദിവാസി വയോധികരുമടക്കം നൂറോളംപേര്‍ക്ക് ക്വാറന്റീന്‍ നിര്‍ദ്ദേശം

പാലക്കാട്: മുതലമടയില്‍ കോവിഡ് സ്ഥിരീകരിച്ചയാള്‍ നിരവധി പ്രദേശവാസികളുമായി ബന്ധപ്പെട്ടതായി വിവരം. ദിവസങ്ങളായി മുതലമട, കാമ്പ്രത്ത്ച്ചള്ള ഭാഗങ്ങളില്‍ കറങ്ങിനടന്നിരുന്ന ഇയാള്‍ ചുള്ളിയാര്‍മേട് പ്രാഥമികാരോഗ്യകേന്ദ്രത്തിലെ ഡോക്ടര്‍, ആരോഗ്യപ്രവര്‍ത്തകര്‍, നാട്ടുകാര്‍ തുടങ്ങിയവരുമായി നിരന്തരം സമ്പര്‍ക്കം പുലര്‍ത്തിയതായി വിവരമുണ്ട്. 12നാണ് ഇയാളുടെ രോഗം സ്ഥിരീകരിച്ചത്. മാവിന്‍തോട്ടത്തിലെ ഗോഡൗണില്‍ കിടന്നുറങ്ങുകയാണ് പതിവ്. പൊള്ളാച്ചി സ്വദേശിയായ ഇദ്ദേഹം പത്തുദിവസമായി മുതലമടയിലെത്തിയിട്ടെന്ന് കരുതുന്നു. അസുഖത്തെ തുടര്‍ന്ന് ആസ്പത്രിയിലെത്തിയ ഇയാള്‍ നഴ്‌സ് ദിനാഘോഷത്തിലും പങ്കെടുത്തു. വിവിധ മറ്റുരോഗികളുമായും കൂട്ടിരിപ്പുകാരുമായും സമ്പര്‍ക്കം പുലര്‍ത്തിയിട്ടുണ്ട്്. ഒരു ബധിരന്റെ കൂടെയായിരുന്നു ഇയാള്‍ അധികസമയവും ഉണ്ടായിരുന്നത്. ഇയാള്‍ ചികിത്സതേടിയ മുതലമട ചുള്ളിയാര്‍മേട് പ്രാഥമികാരോഗ്യകേന്ദ്രം രണ്ട് ദിവസത്തേക്ക് അടച്ചിടാനും കേന്ദ്രം അണുവിമുക്തമാക്കാനും നിര്‍ദ്ദേശിച്ചു. കേന്ദ്രത്തിലെ ജീവനക്കാര്‍ക്ക്് ക്വാറന്റൈന്‍ നിര്‍ദേശവും നല്‍കിയിട്ടുണ്ട്. ഡോക്ടറുടെയും സ്റ്റാഫ് നഴ്‌സുമാരുടെയും സാമ്പിള്‍ ഇന്നലെ പരിശോധനയ്ക്കായി ശേഖരിച്ചു. മെയ് 14ന് കോവിഡ് സ്ഥിരീകരിച്ച വ്യക്തി ക്ഷീണം അനുഭവപ്പെട്ടതിനെ തുടര്‍ന്ന് മെയ് ഏഴ്, ഒന്‍പത്,11 തീയതികളില്‍ ആസ്്പത്രിയില്‍ എത്തിയിട്ടുണ്ട്. ഡോക്ടര്‍ക്ക് കൃത്യമായ വിവരങ്ങള്‍ നല്‍കിയിരുന്നില്ല.അദ്ദേഹത്തിന് ഐവി ട്രിപ്പും ഇഞ്ചക്ഷനും നല്‍കിയിരുന്നു. 11ന് നേരിയ ശ്വാസം മുട്ടല്‍ വന്നപ്പോള്‍ ആണ് ജില്ലാ ആസ്പത്രിയിലേക്ക് വിട്ടത്. കുറച്ച് ദിവസങ്ങള്‍ മുതലമട ആസ്പത്രിയില്‍ ചികിത്സ തേടുകയും അടുത്തുള്ള കമ്മ്യൂണിറ്റി കിച്ചണില്‍ നിന്നും ഭക്ഷണം വാങ്ങി വന്ന് ആസ്പത്രിയില്‍ തന്നെ സമയം ചെലവഴിച്ചതായി പറയുന്നുണ്ട്. മെയ് 9ന് മുതലമടയിലെ വെള്ളാരംകടവ് ബാബുപതി കോളനിയിലെ വൃദ്ധദമ്പതികളെ മാറ്റി പാര്‍പ്പിക്കുന്നതിന് മുന്നോടിയായി ആസ്പത്രിയില്‍ കൊണ്ടു വന്നിരുന്നു. ഇതേ സമയത്ത് ഇദ്ദേഹം ഒ. പി യില്‍ ഉണ്ടായിരുന്നതായാണ് ആസ്പത്രി അധികൃതര്‍ പറയുന്നത്. മുതലമട പഞ്ചായത്ത് പ്രസിഡണ്ട് ഉള്‍പ്പെടെ വിവിധ ജനപ്രതിനിധികള്‍ സാമൂഹികനീതി വകുപ്പിന്റെ നേതൃത്വത്തില്‍ ദമ്പതികളെ മാറ്റി പാര്‍പ്പിക്കുന്നതിനുള്ള സഹായത്തിനായി കൂടെ ഉണ്ടായിരുന്നു. ഇതിന്റെ അടിസ്ഥാനത്തില്‍ അന്ന് ആശുപത്രിയില്‍ ഉണ്ടായിരുന്ന ഇവര്‍ക്കുള്‍പ്പെടെ ക്വാറന്റെയിന്‍ നിര്‍ദ്ദേശിച്ചിട്ടുണ്ട്.തുടര്‍ന്ന് മെയ് 11 ന് ആശുപത്രിയില്‍ നഴ്‌സുമാരെ ആദരിക്കുന്നതിനായി സന്നദ്ധപ്രവര്‍ത്തകനായ ഒരുസന്യാസി ഉള്‍പ്പെടെയുള്ളവര്‍ പങ്കെടുത്ത പരിപാടിയില്‍ ഇയാളുടെ സാമീപ്യം ഉണ്ടായതായി പറയുന്നുണ്ട്. ഇടക്കിടെ മാനസികാസ്വസ്ഥ്യം പ്രകടപ്പിക്കുന്ന ഇയാള്‍ നാല് വര്‍ഷം മുന്നേ ഇവിടം വിട്ടു പൊള്ളാച്ചിക്കു പോയതാണ് എന്നാണ് ബന്ധുക്കള്‍ പറയുന്നത്. കുറച്ചു ദിവസങ്ങള്‍ക്ക് മുന്‍പ് നാട്ടില്‍ എത്തിയിരുന്നു. കാമ്പ്രത്ത് ചള്ളയിലുള്ള മാംഗോ ഗോ ഡൗണില്‍ രാത്രി കിടക്കാറുള്ളതായും കൂടെ എപ്പോഴും ഒരു ഊമയായ യുവാവ് ഉണ്ടാവാറുള്ളതായും പറയുന്നുണ്ട്. കൂടാതെ ഇയാള്‍ വീടുകള്‍ കയറി സഹായം അഭ്യര്‍ത്ഥിച്ചിരുന്നതായും പറയുന്നുണ്ട്. കൂടെയുണ്ടായിരുന്ന വ്യക്തിയുടെ സാമ്പിളും ഇന്ന് പരിശോധനയ്ക്ക് എടുക്കും. വിവരങ്ങള്‍ അന്വേഷിച്ച് റൂട്ട് മാപ്പ് തയ്യാറാക്കി കൊണ്ടിരിക്കുകയാണ്. വിവരങ്ങള്‍ വ്യക്തമായി കിട്ടാത്തതും സങ്കീര്‍ണവുമായതിനാല്‍ റൂട്ട് മാപ്പ് തയ്യാറാക്കാന്‍ കൂടുതല്‍ സമയം വേണ്ടിവരുമെന്നും ഡി.എം.ഒ അറിയിച്ചിട്ടുണ്ട്.