മനാമ : ബഹ്റൈനിൽ കോവിഡ് -19 ബാധിതരായ 439 പേർ കൂടി രോഗ മുക്തരായി . ഇതോടെ രാജ്യത്ത് ആകെ രോഗമുക്തരായവരുടെ എണ്ണം 33894 ആയി ഉയർന്നു . അതേസമയം ജൂലൈ 22 ന് 24 മണിക്കൂറിനിടെ 7791 പേരിൽ നടത്തിയ പരിശോധനയിൽ പുതുതായി 321 പേർക്ക് കൂടി രോഗം സ്ഥിരീകരിച്ചിട്ടുണ്ട് . ഇവരിൽ 162 പേർ പ്രവാസി തൊഴിലാളികളാണ് . മറ്റുള്ളവർക്ക് സമ്പർക്കത്തിലൂടെയും വിദേശത്ത് നിന്ന് എത്തിയത് വഴിയുമാണ് രോഗം പകർന്നിരിക്കുന്നത് . നിലവിൽ 3613 പേരാണ് രാജ്യത്ത് കോവിഡ് -19 ബാധിച്ച് ചികിത്സയിൽ കഴിയുന്നത് . ചികിത്സയിലുള്ളവരിൽ 47 പേരുടെ ആരോഗ്യനില ഗുരുതരമായി തുടരുകയാണ് . ഇന്നലെ മരണപ്പെട്ട 21 കാരനായ സ്വദേശിയടക്കം 130 പേർക്കാണ് ആകെ രാജ്യത്ത് വൈറസ് ബാധയിൽ ജീവൻ നഷ്ടമായത് . ഇവരിൽ 4 പേർ മലയാളികളാണ് . ഇതുവരെ 752485 പേരെ രാജ്യത്ത് പരിശോധനകൾക്ക് വിധേയമാക്കിയിട്ടുണ്ട് .
