യുഎഇ സിഎസ്‌ഐ ദേവാലയത്തിന് സഹായവുമായി എം.എ യൂസഫലി

23
അബുദാബിയിലെ സിഎസ്‌ഐ ദേവാലയ നിര്‍മാണത്തിലേക്ക് ലുലു ഗ്രൂപ് ചെയര്‍മാന്‍ എം.എ യൂസഫലി നല്‍കുന്ന അഞ്ച് ലക്ഷം ദിര്‍ഹമിന്റെ ചെക്ക് അബുദാബി സിഎസ്‌ഐ പാരിഷ് വികാരി റവ. ലാല്‍ജി എം.ഫിലിപ് ഏറ്റുവാങ്ങുന്നു. സിഎസ്‌ഐ സഭാംഗം ആശിഷ് കോശി, ലുലു ഗ്രൂപ് കമ്യൂണിക്കേഷന്‍ ഡയറക്ടര്‍ വി.നന്ദകുമാര്‍ സമീപം

അബുദാബി: ചര്‍ച്ച് ഓഫ് സൗത്ത് ഇന്ത്യ(സിഎസ്‌ഐ)യുടെ അബുദാബിയില്‍ നിര്‍മിക്കുന്ന ദേവാലയത്തിന് വ്യവസായിയും ലുലു ഗ്രൂപ് ചെയര്‍മാനുമായ എം.എ യൂസഫലിയുടെ സഹായ ഹസ്തം. ദേവാലയത്തിന്റെ നിര്‍മാണത്തിലേക്കായി അഞ്ച് ലക്ഷം ദിര്‍ഹം (1 കോടി രൂപ) ആണ് യൂസഫലി നല്‍കിയത്.
അബുദാബി സിഎസ്‌ഐ പാരിഷ് വികാരി റവ.ലാല്‍ജി എം.ഫിലിപ് യൂസഫലിയില്‍ നിന്ന് തുക ഏറ്റുവാങ്ങി. സിഎസ്‌ഐ മധ്യ കേരള മഹാ ഇടവക ബിഷപ് റൈറ്റ് റവ. ഡോ. മലയില്‍ സാബു കോശി ചെറിയാന്‍ നാട്ടില്‍ നിന്നും ഓണ്‍ലൈനായി ചടങ്ങില്‍ പങ്കെടുത്തു.
അബുദാബി കിരീടാവകാശിയും യുഎഇ സായുധ സേന ഡെപ്യൂട്ടി സുപ്രീം കമാന്‍ഡറുമായ ശൈഖ് മുഹമ്മദ് ബിന്‍ സായിദ് അല്‍ നഹ്‌യാന്‍ അബുദാബി അബു മുറൈഖയില്‍ അനുവദിച്ച 4.37 ഏക്കര്‍ ഭൂമിയിലാണ് സിഎസ്‌ഐ ദേവാലയം ഉയരുന്നത്. ഇതിന് സമീപത്തണ് കിരീടാവകാശി അനുവദിച്ച
സ്ഥലത്ത് നിര്‍മാണം പുരോഗമിച്ചു കൊണ്ടിരിക്കുന്ന ബാപ്‌സ് ഹിന്ദു ക്ഷേത്രം.
എല്ലാ മതവിഭാഗങ്ങളുടെയും ആരാധനാലയങ്ങളുള്ള യുഎഇയില്‍ വ്യത്യസ്ത മതക്കാര്‍ക്ക് സഹകരണത്തോടെ കഴിയാനുള്ള സാഹചര്യമാണ് ഭരണാധികാരികള്‍ ഉറപ്പ് നല്‍കുന്നതെന്ന് എം.എ യൂസഫലി പറഞ്ഞു. രാഷ്ട്രപിതാവ് ശൈഖ് സായിദ് ബിന്‍ സുല്‍ത്താന്‍ അല്‍ നഹ്‌യാന്‍ ആവിഷ്‌കരിച്ച സഹിഷ്ണുതാ ആശയങ്ങളാണ് യുഎഇ ഭരണകൂടം പിന്തുടരുന്നത്. അബുദാബിയിലെ നഗര ഹൃദയത്തിലുള്ള പള്ളിക്ക് യേശു ക്രിസ്തുവിന്റെ മാതാവിന്റെ പേരിട്ടത് (മറിയം ഉമ്മുല്‍ ഈസ, അഥവാ യേശുവിന്റെ മാതാവ് മറിയം മസ്ജിദ്) ഇതിന്റെ ഉത്തമോദാഹരണമാണെന്നും യൂസഫലി പറഞ്ഞു. സാഹോദര്യത്തിന്റെയും മാനവികതയുടെയും സമാധാനത്തിന്റെയും പുതിയ മാതൃകയാണ് ഇതിലൂടെ ലോകത്തിനു മുന്നില്‍ യുഎഇ കാണിച്ചു കൊടുക്കുന്നതെന്നും യൂസഫലി കൂട്ടിച്ചേര്‍ത്തു.
15,000 ചതുരശ്ര അടി വിസ്തൃതിയില്‍ നിര്‍മിക്കുന്നതും 750 പേര്‍ക്ക് പ്രാര്‍ത്ഥനാ സൗകര്യമുള്ള ദേവാലയത്തിന്റെ നിര്‍മാണം ഈ വര്‍ഷാവസാനത്തോടെ പൂര്‍ത്തിയാകും.
യുഎഇ കാബിനറ്റ് അംഗവും സഹിഷ്ണതാ വകുപ്പ് മന്ത്രിയുമായ ശൈഖ് നഹ്‌യാന്‍ ബിന്‍ മുബാറക് അല്‍ നഹ്‌യാനാണ് ദേവാലയത്തിന്റെ ശിലാസ്ഥാപന കര്‍മം നടത്തിയത്.